пытанне-адказ
24 верасня 2026 года ў Беларусі пройдзе маштабны Адзіны дзень бяспекі
22.09.2026Яго галоўная мэта — навучыць грамадзян правільнаму алгарытму дзеянняў пры пажарах і іншых няштатных сітуацыях, а таксама сфарміраваць практычныя навыкі аказання першай дапамогі.
У межах мерапрыемства па ўсёй краіне пройдуць вучэбныя эвакуацыі і практычныя трэніроўкі. Асаблівая ўвага будзе ўдзелена дзеянням работнікаў у выпадку ўзнікнення надзвычайнай сітуацыі: як не разгубіцца, своечасова паведаміць пра небяспеку, бяспечна пакінуць будынак і аказаць неабходную дапамогу пацярпелым.
Ключавая роля ў правядзенні Адзінага дня бяспекі адводзіцца кіраўнікам прадпрыемстваў і арганізацый. Ім неабходна арганізаваць для работнікаў тэарэтычнае і практычнае навучанне, забяспечыць правядзенне трэніровак і адпрацоўку алгарытмаў дзеянняў пры ўзнікненні надзвычайных сітуацый.
У гэты дзень спецыялісты МНС таксама наведаюць шэраг арганізацый і ўстаноў адукацыі, дзе акажуць кансультатыўную дапамогу і прымуць удзел у практычных трэніроўках па эвакуацыі.
Акрамя таго, ва ўсіх рэгіёнах краіны будуць працаваць 139 тэматычных навучальных пляцовак у месцах масавага знаходжання людзей. Іх сумесна арганізуюць МНС, МУС, Міністэрства аховы здароўя і Беларускае Таварыства Чырвонага Крыжа.
Наведвальнікі пляцовак змогуць адпрацаваць навыкі сардэчна-лёгачнай рэанімацыі на манекенах-трэнажорах, даведацца пра правілы паводзін у натоўпе, а таксама атрымаць практычныя рэкамендацыі па зніжэнні рызыкі траўміравання пры пажарах і іншых надзвычайных сітуацыях.
Для кіраўнікоў і работнікаў на афіцыйным інтэрнэт-партале МНС створаны спецыяльны раздзел, прысвечаны Адзінаму дню бяспекі. Тут даступныя памяткі, аўдыя- і відэаматэрыялы, наглядныя матэрыялы, а таксама інтэрактыўная карта з месцамі правядзення тэматычных пляцовак.
Бяспека — гэта не толькі захаванне правілаў, але і гатоўнасць правільна дзейнічаць у крытычнай сітуацыі. Адзіны дзень бяспекі дапаможа кожнаму замацаваць неабходныя веды і практычныя навыкі.